UEFA njoftoi në faqen e saj zyrtare nisjen e hetimeve si për Serbinë, si organizatore e ndeshjes, ashtu edhe për Shqipërinë.
Serbët akuzohen për hedhjen e sendeve të forta, fishekzjarreve dhe objekteve të tjera të rrezikshme në fushë, trazira në shkallët e stadiumit, hyrje në fushë e tifozëve, mosmarrjen e masave të nevojshme për zhvillimin normal të ndeshjes dhe drejtim lazerash ndaj futbollistëve kundërshtarë.
Ndërkohë, Shqipëria do të hetohet për refuzimin e vazhdimit të lojës dhe shfaqjen e banerave të paligjshëm në stadium.
Ndeshja në Beograd u braktis pas kaosit për shkak të një minihelikopteri të telekomanduar, i cili shfaqi një flamur të Shqipërisë së Madhe në fushën e lojës, duke nxitur kështu një përleshje mes lojtarëve dhe dhjetra tifozëve.
Gjyqtari Martin Atkinson urdhëroi menjëherë lojtarët të dilnin nga fusha, pas incidentit, i cili ndodhi në fund të pjesës së parë (pas minutës së 41). Ata u drejtuan për në tunelin e dhomave të zhveshjes, por sërish u sulmuan me sende të forta. Pas rikthimit të rendit lojtarët e Shqipërisë refuzuan të ktheheshin në fushë, duke mos lënë asnjë alternativë veç anullimit të ndeshjes.
Presidenti i UEFA-s, Michel Platini, kritikoi gjithçka ka ndodhur.
“Futbolli supozohet t’i bashkojë njerëzit dhe loja jonë nuk duhet ngatërruar me politikat e çfarëdolloji. Skenat në Beograd natën e kaluar, ishin të pafalshme", thotë Platini, ndërkohë që shefi i FIFA-s Sepp Blatter, shton edhe më tej dënimin.
Mediat lokale në Beograd pretendojnë se minihelikopteri që mbante flamurin kontrollohej nga brenda stadiumit, nga vëllai i kryeministrit të Shqiërisë, Olsi Rama, i cili ndodhej në tribunën VIP. Ai u arrestua fillimisht, e ma pas u lirua.