25-vjeçari Shkëlzen Kalo u gjet i vrarë me armë zjarri në ndërtesën ku ai ishte punësuar si roje në fshatin Hajdaraj, të komunës Synej. Mësohet se i riu është qëlluar teksa ishte në gjumë.
Familjarët e viktimës hodhën menjëherë dyshime për familjarët e ish-të dashurës së 25-vjeçarit. "Ne nuk e dimë kush na e vrau vëllain. Ai ka dashur një vajzë këtu në fshat dhe këtë e dinë të gjithë. Shkëlzeni është konfrontuar fizikisht me familjarët e saj. Ata nuk donin kurrsesi që vajza të fejohej me vëllain tonë, edhe pse ata duheshin me njëri-tjetrin. Policia e Prokuroria të gjejnë autorët e t'i vënë para drejtësisë, pasi vëllai ishte i ri dhe i pafajshëm të vritej në mënyrë mizore", - tha vëllai i viktimës, Qazim Kala.
VRASJA
Mbrëmjen e së shtunës, Shkëlzen Kala ka shkuar në godinën dykatëshe (lokal e banesë në ndërtim e sipër) ku punonte si roje. E ndërsa ka shkuar në punë, 25-vjeçari nuk ka komunikuar më me familjarët e tij. Të nesërmen (të dielën), rreth orës 18:00, ai është gjetur i pajetë nga banorë të lagjes, të cilët menjëherë kanë njoftuar Policinë. Burime pranë grupit hetimor pohuan se viktima është gjetur i vrarë me dy plumba pistolete në shpatull, në katin e dytë të ndërtesës (në krevat). Pas kryerjes së hetimeve paraprake, ekspertët deklaruan se Kala mund të jetë vrarë në orët e para të mëngjesit të së dielës. Hetuesit e çështjes kanë marrë në pyetje të afërm të një vajze, e cila ka qenë për disa muaj e dashura e 25-vjeçarit.
Familjarët e vajzës kanë qenë kundër lidhjes me Shkëlzen Kalën. Madje në atë kohë ata e kanë denoncuar Kalën për rrëmbim personi. Më pas, Policia e ka akuzuar Kalën për tentativë vjedhjeje. Për këtë akuzë, ai u dënua me 6 muaj burgim, të cilin e kreu në burgun e Rrogozhinës. Midis viktimës dhe prindërve të vajzës ka pasur edhe konfrontim fizik, ndonëse më pas dy të rinjtë u ndanë dhe e dashura e tij u fejua me një djalë tjetër. Sipas hetuesve, pas kësaj ndarjeje, 25-vjeçari kishte krijuar raporte me disa vajza në fshat dhe se lidhjet e tij kanë qenë të paqëndrueshme.