Më shumë se sa arratisja, lajm bëri një filmim i realizuar nga vetë të burgosurit. Njëri prej tyre me një aparat celular ka regjistruar punimet në galerinë nëntokësore të qelisë dhe e ka postuar atë në rrjetet sociale.
Në videon prej thuajse 20 sekondash shihen të burgosur që i janë përveshur punës për hapjen e tunelit, ndërsa vetë protagonisti i videos thotë: “Jemi duke gërmuar. Kemi ecur mirë!”.
13 të burgosurit besohet se kanë mundur të çajnë tunelin e tyre për më pak se 60 ditë, sa ishte edhe koha kur ishte kontrolluar për herë të fundit nga rojet qelia ku ata mbaheshin.
Menjëherë pas marrjes së lajmit policia braziliane është vënë në kërkim të të arratisurve që cilësohen me rrezikshmëri të lartë. Deri më tani janë kapur dy prej tyre, ndërkohë që është pezulluar nga detyra edhe personeli i burgut përgjegjës për ruajtjen e tyre.